ВСЕЛЕНСКИ ЛЕТ

септември 16, 2019септември 13, 2019 Trencho Dimitrioski

(Од необјавената поетска збирка „Кучешко време“ – четврти дел, „Раѓање“)

Во мојот дом,

крај огниште топло,

прастар култ

ме држи.

И во најтешка мака

останувам со топлината,

скриена како богатство

заветно,

од прадедовци клетва,

молба и надеж

за вселенски лет.

Одисејата на порталот Пелагон започна пред две години, односно 2016 година, но траеше само неколку месеци – од мај до септември истата година. Порталот беше неколку пати блокиран и на крајот мораше да прекине со работа. Не можеме да кажеме што, конкретно, се случи. Имаше и некој вид закана за „присвојување“ на некакви заслуги, за прескокнување авторитети од повисоки инстанци, но за нас не е јасно дали беше насилно прекинување. Беше ли намерен злобен чин? Важно е дека неговата успешна Одисеја беше прекината, токму тогаш кога постигнавме од 150.000 до 200.000 посети месечно. Тоа беше вистинско пријатно изненадување за нас. Затоа и разочарувањето од прекинувањето со работа беше големо. Сепак, Пелагон, на некој начин беше жив, како за нас, така и за читателите кои го следеа. Денес, решивме и вложивме напори тој вистински да заживее, со полна содржина и со полн „здив“.
Има ли потреба од посебно објаснување за појавата на нов медиумски производ? Зарем верува некој дека сѐ е кажано, сѐ е медиумски покриено, та просторот е сосема зафатен и сите содржини се опфатени и сите вистини се апсолвирани?
Не!
Ние веруваме дека сосема малку е направено на тој план, многу вистини и вредности се скриени и чекаат на соодветен пристап и обработка, чекаат на сопствената светлина, на сопственото раѓање и заживување, на продлабочување и афирмирање.
ПЕЛАГОН значи богатство од содржини и мистика. Безброј теми, прикриени вистини, мистерии, бесценето културно богатство, непозната материјална култура, скриена под покровот на минатото, всушност, под пластови време, култура, историја, настани и временски периоди. Многу содржини, поврзани со Пелагон, останале под поновите „слоеви“, подзаборавени или сосема надвор од меморијата на современото живеење но, во исто време, овие содржини се неделив дел од вкупните македонски вредности, како и од општото светско наследство – култура и цивилизација.
Работејќи долго време на истражување, докуметирање, публикување, презентација, афирмација и популаризација на културно–историски содржини од областите Пелагонија, Мариово и Прекурид, решивме да започнеме и еден ваков медиумски проект, чија единствена цел ќе биде продлабочување и проширување на одамна започнатата дејност и, особено, афирмирање на голем број исклучителни вредности, кои се сосема малку познати или непознати за пошироката, па и за културната и научната јавност. Се надеваме дека создаваме една исклучителна ПРИКАЗНА ЗАСНОВАНА НА ИЗВОРНО ОБЈЕКТИВНО ИСТРАЖУВАЊЕ И ПРОСЛЕДУВАЊЕ НА ВИСТИНСКИ ВРЕДНОСТИ кои ќе бидат од општа полезност за нашите читатели, како и за културниот и цивилизацискиот од на човештвото. Во име на тоа, со уште поголем елан и ангажман ја продолжуваме нашата Одисеја.

You May Also Like

КАКВА НАЦИОНАЛНА ОПРЕДЕЛБА ИМАЛ ЛЕГЕНДАРНИОТ ВОЈВОДА ОД СЕЛОТО КРУШЕВИЦА, МАРИОВО, СТОЈАН КУЛИЌОВ, ПОЗНАТ КАКО ТОЛЕ ПАША

СЛИКАРСТВОТО НА КРУШЕВСКАТА ТАЈФА НА АНАСТАС ЗОГРАФ (ТАШЕ) ВО ЦРКВАТА „СВ. НИКОЛА ЧУДОТВОРЕЦ“ ВО СЕЛОТО СОПОТНИЦА, ДЕМИРХИСАРСКО

ЛИХНИД (ОХРИД)